on the elections

Trapo sa eleksyon
ni jan & george

Marumi. Nakakadiri. Wala nang maniniwala ngayon na malinis ang pulitika. Ang eleksyon kasi sa panahong ito ay labanan sa pagitan ng prinsipyo at pera. At kapag magsalita na ang pera, tumatahimik ang prinsipyo. Anupa't babaha na naman ng salapi. Kwartang ninakaw ng mga politiko sa kaban ng bayan kaya ang mga mamamayan ay tumatanggap ng pera kasi ito naman ay galing sa kanila.
Dati pa, tahimik na akong nagngingitngit sa mga politiko ng ating bansa o kaya sa mga taong bumuboto sa kanila. Lahat na lang na maisip kong posibleng masisisi sa papalalang sitwasyon ng ating bansa isinisisi ko. Sa tuwing papalapit ang eleksiyon, nahahati sa dalawa ang pananaw ng mga tao. May mga naniniwala pa rin sa mga pangako ng mga politiko dahil sa matatamis nilang mga dila. Itinuturing silang pag-asa, na mag-aahon sa kanila mula sa abang kalagayan. Sa kabilang dako, may mga mulat na sawang-sawa sa mga litanya ng mga politiko sa tuwing nagtatalumpati sa entablado. Tiyak ko ring pinanabikan ng mga trapo ang panahong ito.
Kagaya ng ibang trabaho, may katangiang kailangan para makasabak sa mundo ng pulitika – ang apat na "k" ng mga trapo: Kwarta, Koneksyon, Kasinungalingan at Kapal ng mukha. Kailangan nilang paghandaan ang mga bagay na magiging basehan ng pagkapanalo nila. Hindi na bago sa mga trapo ang pagbibigay ng pera sa mga botante. Sa pamamagitan ng kanilang koneksyon, mapapadali ang pagkumbinse sa mga botante. Sa pagdating ng miting de avance dapat din niyang ihanda ang litanyang sasambitin para makumbinse ang mamamayan na siya ang nararapat piliin sa mga kandidato. At sa bandang huli, dapat makapal ang kanyang mukha upang harapin ang mga naniwala sa kanyang sinseridad ngunit kanya lamang binigo.
Isa lang ang sigurado ngayong palapit na ang botohan, lahat ay gagawin ng mga kandidato. Ilang buwan pa lamang, napapanood natin sa telebisyon ang balita tungkol sa mga pinaslang na mga politiko. Ang hidwaang ito ay hindi lang sa pagitan ng mga politiko at kalaban niyang mga politiko rin. Ang mga mamamayan ay nanganganib ang buhay dahil pinapaslang lamang ang mga kritiko ng mga pulitiko.
At ngayon, isa na ako sa mahalagang pwersa na magdedesisyon sa kapakanan ng Pilipinas sa Mayo. Hindi na bilang tagapagmasid lamang. Tagapagmasid sa kinahihinatnan ng ating bayan. Nakaatang sa ating mga balikat ang malaking responsibilidad bilang mamamayang Pilipino. Kasali na tayo sa magluluklok sa mga uupo sa poder ng gobyerno. Sana hindi masayang ang ating mga boto.
Hindi ko pa naman binibigyang-wakas ang aking paniniwala na balang araw pagbabago ay makakamtan din. Umaasa pa rin akong mababaliktad pa ang tatsulok. Sana maging kritikal sa pagpili ang mga botante at hindi nila ibase sa kakarampot na pera na ibibigay ng mga kandidato na nagsisilbing piring at busal sa mga nakakatanggap.

###